ففتا

اوزبیگیم

حماسی قصیده سی
تاریخینگ دورمینگ عصرلر ایچره پنهان اوزبیگیم ،
سینگه تینگداش پامیر و آقساچ تیانشان اوزبیگیم.
سویله سین افراسیاب و سویله سین اورخون خطی،
کهنه تاریخ شاده سیده بیتته مر جان اوزبیگیم
. البیرونی، الخوارزمی، الفاراب اولادیدین،
اصل نسلی بلکه اوزلوق، بلکه ترخان اوزبیگیم.
اوتدیلر شورلیک باشینگدن اوینه تیب شمشیرلرین،
نیچه خاقان، نیچه سلطان، نیچه مینگ خان، اوزبیگیم.
تاغلرینگ تیگره نگده گویا بوغمه اژدر بولدیو ،
ایککی دریا – ایککی چشمینگ ، چشم گریان اوزبیگیم.
قیصر روم نیزه سیدن بغریده داغ اوزره داغ ،
چینگیزو باتوتیغی گه کوکسی قلقان اوزبیگیم.
یاغدی تورت یاندن عصرلر باشینگه تیرِ کمان،
عمری قربان، ملکی تاراج، یورتی ویران، اوزبیگیم.
دور ظلمیگه ولیکن بیر عمر باش ایگمه دینگ،
سین – مقنع ، سربدار، سین – ایرک سیورخان اوزبیگیم.
سین نه زردشت، سین نه بودا، سینگه نی آتش، صنم،
آدمیلیک دینی بیرله تازه ایمان اوزبیگیم.
معرفت نینگ شعله سیگه تالپینیب ظلمت ارا،
کوزلرینگدن آقدی تونلر کوکبستان، اوزبیگیم.
توزدیو میرزا اولوغ بیگ کورَگانی جدولین،
سِرلی آسمان تاقیگه ایلک – قویدی نروان اوزبیگیم.
میر علی شیر نعره سیگه عکس – صدا بیردی جهان،
شعریت ملکیده بولدی شاه و سلطان، اوزبیگیم.
علم و شعرده شاه و سلطان، لیک تقدیریگه قل،
اوز ایلیده چیکدی غربت ، زار و نالا ن اوزبیگیم.
میرزا بابر – سین ، فغانینگ سالدی عالم اوزره اوت،
شاه مشرب قانی سینده اوردی طغیان، اوزبیگیم.
شعریت نینگ گلشنیده سولدی محزون نادره ،
سیم تنینی یودی کوز یاش، کومدی آرمان، اوزبیگیم.
ییغله دی فرقت ده فرقت هم مقیم لیکده مقیم،
نالیشینگدن هند و افغان قیلدی افغان اوزبیگیم.
تاریخینگ بیتمککه، خلقیم، مینگته فردوسی کیره ک،
چونکه بیر بار چیککن آهینگ، مینگته داستان اوزبیگیم.
آ رتده قالدی کهنه تاریخ آرتده قالدی درد – ستم ،
کیتدی وهمینگ، بیتدی زخمینگ، تاپدی درمان اوزبیگیم.
بولدی آسمانینگ چراغان، بخت خورشیدی بیلن،
بولدی عصر تیره شامینگ شعله افشان اوزبیگیم.
مین وطن نی باغ دیب ایتسم، سین سن اونده بیتته گل ،
مین وطن نی کوز دیب ایتسم، بیته مژگان اوزبیگیم
.
فخر ایتر من، آنه خلقیم، کوکره گیمنی تاغ قیلیب،
کوکره گیده تاغ کوترگن تنتی دهقان اوزبیگیم.
اوزبیگیم دیب کینگ جهانگه نی اوچون مدح ایتمه یین
اوزلیگیم بیلماققه دوریم بیردی امکان، اوزبیگیم.
مین بویوک یورت اوغلی دورمن، مین بشر فرزندی من،
لیکن اول سینگه بولسم صادق اوغلان اوزبیگیم.
مینگه پوشکین بیر جهان و مینگه بایرون بیر جهان،
لیک نوایی دیک بابام بار کوکسیم آسمان اوزبیگیم.
قیده بارمی، باشده توپیم، شهرتیم، قدریم بو یو ک،
عالم اوزره نامی کیتگن اوزبیکستان اوزبیگیم.
بو قصیدم سینگه خلقیم، آ ق سوت و توز حرمتی،
ایرکین اوغلینگ من، قبول ایت، اوزبیگیم جان اوزبیگیم.

حرمتلی شرعی جوزجانی نینگ صحیفه سیدن

Short URL: https://www.turklar.com/turkic/?p=3586

Posted by on آگوست 2 2015. Filed under ایرتكلر و قوشوقلر, ینگی عنوان لر. You can follow any responses to this entry through the RSS 2.0. Both comments and pings are currently closed.

Comments are closed

300x250 ad code [Inner pages]

Search Archive

Search by Date
Search by Category
Search with Google

Photo Gallery

120x600 ad code [Inner pages]
ورود | Designed by Gabfire themes