ففتا

* قیزیقرلی طنز

* قیزیقرلی طنز
* یازووچی: عزیز نسین(نېسېن)
* تیلماچ: حلیم یارقین
*
* بیر ملا قیشلاقده

چمه‌سی آلتمیش ییل بورونلر بیر ملا بیر قیشلاققه یېتیب باردی.
قیشلاق نینگ اېسکی مسجدینی کۉریشی بیلن، قیشلاق اولوسی نینگ مسلمان اېکنینی بیلدی. او قووانیب قیشلاق قریه‌داری نینگ قاشیگه باریب، قیشلاق نینگ امامی بۉلاله‌من، دېب ایتدی.
ییللر نماز اۉقیمه‌گن و جماعت نمازینی هم عمریده کۉرمه‌گن قریه‌دار، اگر بو ملاگه نمازنی بیلمه‌یمن دېسه جدا یمان گپ بۉله‌دی، دېب اۉزیچه اۉیله‌دی. شونینگ اوچون، هیچ قنداق توضیح بېرمسدن، موافقت قیلدی.
اۉشه کېچه‌نینگ اۉزیده او برچه اولوسنی تۉپلب، ملا امام نینگ کېلگنینی اولرگه ایتیب بېردی. اداغده نماز قاعده‌لرینی بیلمس‌لیگینی ایتیب، سیزلردن کیم شو قاعده‌لرنی بیله‌دی؟ دېب سۉره‌دی.
اولوس نینگ عجبلنگن باقیشلری قریه‌دارنینگ جوابی اېدی.
اداغده قیشلاق نینگ اېنگ کېکسه‌لریدن بیری دېدی: “مېنینگ بیلیشیمچه، مسلمان بۉلیشده بیر نرسه‌نی بیلیشینگ لازم اېمس. ملا امام نیمه‌یی که قیلسه، بیز هم تقلید قیلسک، بۉلدی.”
بو حل یۉسینی بیلن برچه‌نینگ خاطری جمع بۉلیب، نمازنی ادا قیلماق اوچون اېسکی مسجد تمان جۉنه‌دیلر.
ملا امام صف نینگ ایلگری‌سیده توردی و برچه مردم ارقه‌سیگه تۉپلندیلر.
امام قۉلینی قولاغلری توبیگه قۉییب، بیر پِچیرده‌دی. مردم هم قۉللرینی کۉتردیلر، چون امام نینگ نیمه دېگنینی بیلمس اېدیلر، اولر هم هر بیری پِچیرده‌ب قۉیدیلر.
امام قۉللرینی قویی تشله‌دی و یوکسک تاووش بیلن “الله اکبر” دېدی. مردم هم بیر نیمه بیلگنلریدن ذوقله‌نیب “الله اکبر”، دېب بقیردیلر.
امام ینه تیلی نینگ تگیده بیر نیمه اۉقیدی، مردم هم تیللری نینگ تگیده ناله قیلر اېدیلر.
امام قۉللرینی تیزه‌سیگه قۉیدی و بیر نیمه دېدی. مردم هم قۉللرینی تیزه‌گه قۉیدلر و ناله چېکدیلر. امام قیته ایاققه توردی و “الله اکبر”، دېدی. مردم هم ایاققه توردیلر و “الله اکبر”، دېب بقیردیلر.
امام توپراققه ییقیلدی و تیلی نینگ تگیده بیر نیمه‌لر دېدی. مردم هم توپراققه ییقیلدیلر و هر بیری تیلی نینگ تگیده بیر نیمه‌نی شیبیرله‌دیلر.
امام تیز چۉکیب اۉلتیردی، مردم هم تیز چۉکیب اۉلتیردیلر.
شو چاغده امام نینگ ایاغی اتاق سطحی نینگ ایکی تخته‌سی اره‌سیده اوشله‌نیب قالدی و او آآآآآآخ، دېب بقیر-چقیر قیلدی.
مردم هم ذوقله‌نیب آآآآآخ دېب بقیردیلر.
امام اۉزینی اونداق وضعیتدن قوتقه‌ریش اوچون تلاشیب، اونگ و سۉلگه تشلر اېدی و یا قۉلی بیلن ایکی تخته اره‌سینی آچیشگه اینتیلر اېدی. مردم هم اۉزلرینی اۉنگ و سۉلگه اېگیب، قۉللری بیلن یېرگه ضربه اورر اېدیلر.
امام درددن تۉلغه‌نیب، “یا تېنگری مدد بېر!” دېب بقیرر اېدی، مردم هم اونینگ ایزیدن تېنگری درگاهیگه التجا قیلر اېدیلر.
امام “اې نادان انسانلر، کۉرمیسیزلر، وضعیتنی کۉرمه‌ی‌سیزلرمی؟” دېب بقیرر اېدی. مردم هم اونینگ ایزیدن عین عباره‌نی بقیریب ایتر اېدیلر.
امام درددن یېرنی چنگاللب، تېنگریدن کمک ایستر اېدی، مردم هم یېرنی چنگاللب، تېنگریدن کمک تیلر اېدیلر.
نهایت، اوچ-تۉرت دقیقه‌دن سۉنگ امام اۉزینی قوتقه‌رالدی و قتیق درددن تۉلغنه‌یاتیب، جمعیتگه قیا باقیب هوشدن کېتدی.
جمعیت هم بیر-بیریگه قیا باقیب، اۉزلرینی یېرگه تشله‌دیلر و امام هوشیگه کېلگونچه اۉشه حالتده قالدیلر.
ملا قیشلاققه ینگلیش (سهواً) کېلگنینی بیلیب، هیچ بیر توضیح بېرمسدن قیشلاقنی ترک اېتیب، کېتدی. بیراق اۉشه تاریخدن بوگونگچه، جماعت نمازی قیشلاقده برقرار دیر. مردم “الله اکبر”لر اره‌سیده‌گی ذکرلردن خبرلری بۉلمه‌گنلیکلری اوچون اولرنی ایتمه‌یدیلر، البته. عوضیگه نمازنینگ اداغیده‌گی مراسم نی جدا شکوهلی اجرا اېته‌دیلر.
قیشلاق بیلیمدانلری بوگونگچه، نمازلری‌نینگ سۉنگگی عمللری فلسفه‌سی حقیده 12 ته کتاب چاپ قیلگنلر. بیراق اۉشه بیرینچی عمللرده ایریم جزئی انحرافلر یوز بېرگن، البته. شو باعث، حاضر اولر 22 فرقه‌گه بۉلینگنلر. بعضیلر یېرگه چنگ اۉریشده، نماز اۉقیله‌دیگن یېرنینگ سطحی تخته بۉلسین دېسه‌لر، ایریملر بۉلسه هر نرسه‌گه چنگ اوریلیش جایز دېب بیله‌دیلر. بعضیلر نمازدن کېین بیهوشلیک مدتی قنچه کۉپ بۉلسه، انسان اۉشنچه تېنگریگه یقینراق بۉله‌دی، دېب ایشانه‌دیلر. لیکن بعضیلرنینگ اعتقادیگه کۉره بیهوشلیک نینگ کیفیتی مهم، نې اونینگ مدتی.
هرچند اولر جزئیاتده فرقلی بۉلسه‌لر- ده، بیراق کلیتده عقیده‌لری بیر. او هم شو که، بیر عده مرجع بۉلسین و بشقه‌لر تقلید قیلسینلر. (اداغ)

Short URL: https://www.turklar.com/turkic/?p=3613

Posted by on اکتبر 4 2015. Filed under ایرتكلر و قوشوقلر, ینگی عنوان لر. You can follow any responses to this entry through the RSS 2.0. Both comments and pings are currently closed.

Comments are closed

300x250 ad code [Inner pages]

Search Archive

Search by Date
Search by Category
Search with Google

Photo Gallery

120x600 ad code [Inner pages]
ورود | Designed by Gabfire themes